Kampante na sa karun ang paminsaron sang pamilya sang biktima nga nakit-an nga naga-utaw-utaw sa baybayon sang Barangay Balaring, Ivisan Capiz.
Sa exclusive interview sang Bombo Radyo kay Mr. Rene Solioman Hamol pakaisa sang biktima, ginpahayag sini nga sadtong Pebrero 7 pa nareport nga nadula ang ila pakaisa nga ginkilala kay Salvacion Salioman Francisco sa diin sakay sang isa ka baruto kaupod ang bana sini nga si Narlito Francisco nga magapauli kun tani sila sa Burias Island sang hinali na lamang nga ginhampak sang mabaskog nga balud ang ila ginasakyan rason nga nahulog ang mga ini sa dagat.
Suno pa kay Hamol, takna alas 5:00 sang aga sang nasambit nga petsa naghalin ang mag-asawa, apang pag-abot alas 7:00 sang aga natabo ang insidente.
Bangud sini, gilayon nga ginpangita nila ang biktima kaupod ang pila nila ka mga pamilya tubtob nga nakabati sila sang balita nagikan sa Bombo Radyo Roxas nga may nasapwan nga bangkay sang babaye sa baybayon sang Barangay Balaring, Ivisan Capiz.
Mahibaluan nga gin-anud sang mabaskog nga balod ang biktima kag wala ini naka-uyat sa baruto apang ang asawa sini maswerte naman nga nakaluwas pina-agi sa paghawid sini sa isa ka styrofoam sa diin nagpalutaw-lutaw kag nag-upod sa hampak sang balud tubtob nga naka-abot ini sa Burias Island takna ala 1:00 na sang hapon.
Sa pagpangusisa ni Hamol sa bana sang iya pakaisa ginsiling sini nga wala naubon ang ila bangka kag ginklaro nga nahulog lamang sila bangud sa mabaskog nga paghampak sang balud.
Plano man sang pamilya nga ipa-idalum sa autopsy ang bangkay ni Salvacion agud mahibaluan kun anu ang gintunaan sang iya kamatayon kag makuha ang pila ka mga pagduda sa ila pamilya.
Sa karun nagahulat na lamang sila suno diri kun anu ang mahimo nga aksyon sang Ivisan Municipal Police Station kag sang kapulisan sa Masbate agud mapauli na ang bangkay sa ila nga lugar.
Samtang dako man ang ila pagpasalamat sa talatapan sang Bombo Radyo Roxas bangud pina-agi diri nakit-an nila ang ila himata apisar nga wala na ini sang kabuhi.
