Wala pa sang desisyon ang Land Transportation Franchising and Regulatory Board (LTFRB) sa hirit nga P1.00 nga saka pamasahe sang mga transport group.
Nagpatigayon sang hearing sa LTFRB para sa nationwide fare adjustment nga gin-file sang mga grupo nga ginakalakipan sang Pangkalahatang Sanggunian Manila and Suburbs Drivers Association Nationwide (Pasang Masda), Alliance of Transport, Operators, and Drivers’ Association of the Philippines, kag Alliance of Concerned Transport Organization.
Pila sa mga ginpunto ni Atty. Veronica Soriano, ang abogado sang mga petitioner nga ang ulihi nga ginhatagan sila sang P1 nga saka sa pamasahe sadto pa sang Oktubre 2023.
Kulang man ang fuel subsidy nga ginahatag sang gobyerno, padayon nga pagsaka sang presyo sang mga petrolyo kag pagsaka sang operational kag maintenance expenses.
Ginsiling naman ni Atty. Teofilo Guadiz III ang LTFRB Chairman, na kinahanglan maka-angkon sang solido nga pagtu-on ang grupo hanungod sa alegasyon nga kulang ang fuel subsidy program sang gobyerno.
Bangud sini, ginsiling sang LTFRB chairman nga magasinapol ang ila nga board kag magapaguha sang resolusyon kun aprubahan ukon ibasura ang hirit nga dugang pamasahe sang mga transport group.
