Maga-file na sang kaso sa National Bureau of Investigation (NBI), sa Miyerkules, si Senadora Risa Hontiveros batuk kay Alyas ‘Rene’ — ang bumaliskad nga testigo sa hearing sadto natuhoy sa mga ginapahayag nga pag-abuso ni Pastor Apollo Quiboloy.
Ang nasambit nga aksyon ni Hontiveros ang kasunod sang naglapta nga video ni Alyas ‘Rene’ kun sa diin gin-akusaran sini ang senadora nga ginbaydan siya sang P1 million agud magtestigo sa mga seryoso nga kaso batuk kay Quiboloy kag dalahigon sanday anay Presidente Rodrigo Duterte kag Vice President Sara Duterte.
Magluwas kay Alyas ‘Rene’ akusaran man sang senadora ang mga nagpaguha sang naglapta nga video.
Suno sa senadora, indi lang fake news ang video kundi isa man ka witness tampering ukon pamahog sa testigo.
Sa panaysayon ni Hontiveros, si Alyas ‘Rene’ ang pabalik-balik nga nagpalapit sa iya nga opisina—wala ini ginpahog kag gin pigos kundi suno sa iya mismo ini ang naglagas sa ila nga talatapan agud magpalab-ot sang iya nga bahin.
Dugang pa sang senadora, sang Pebrero 7, 2024, si Alyas ‘Rene’ nagpangayo sa ila sang kwarta agud ipangbakal sang laptop—kun sa diin klaro suno sa iya ang polisiya sang iya nga opisina nga indi sila nagahatag sang financial assistance sa potential witness rason nga wala na suno sa iya natingala pa ang mga mamalidha nga kun ang Kingdom of Jesus Christ—nga ginapamunuan ni Quiboloy ang nagbayad kay Alyas ‘Rene.’
Sang Pebrero 22, 2024, ginapahayag ginganyat man ang anay testigo nga magbawi sa hearing agud mahuy-an si Hontiveros rason nga suno kay Hontiveros indi na nya pagpalampason ang mga pagpamahog sa mga testigo kag pahugon ang Senado bilang institusyon.
