Ginhatagan pagtamod ni Batangas 2nd District Representative Gerville Luistro nga ang subong nga tikang sang House Committee on Justice indi isa ka hearing agud mahibaluan ang sala, kundi agud lamang mahibaluan ang probable cause sa impeachment process nga ginapangatubang ni Vice President Sara Duterte.
Ginhimo sang mamalidha ang paathag kasunod sang kapaslawan ni Duterte nga makatambong sa hearing nga natalana subong nga adlaw.
Suno kay Luistro, importante nga hangpon ang mga limitasyon kag mandato sang Kamara sa sini nga hugnat sang proseso. Gin-athag sini nga ang ginahimo sa lower house isa lamang ka clarificatory hearing kag malayo sa aktwal nga hearing nga pagahiwaton sa senado kun mag-uswag ang reklamo.
Matandaan nga ang pagdeterminar sang probable cause amo lamang ang mangin basehan sang komitiba agud mahibaluan kun may yara sang bastante nga rason kag ebidensya sa pag-file sang Articles of Impeachment sa Senado, nga magaserbe nga impeachment court.
Apisar nga wala nag-apelar ukon nag-atubang sa komitiba si Duterte subong nga adlaw, nagpadayon ang hearing para sa mga mamalidha agud timbangon ang basehan sang reklamo.
