Nanindugan si House Speaker Martin Romualdez sang Hunyo 4 ang iya pangako nga himuon nga permanente ang ₱20 kada kilo sang bugas, bilang kabahin sang katuyuan ni Presidente Ferdinand Marcos Jr. nga mahatagan sang barato nga pagkaon ang tagsa ka Pilipino
Sa iya pagkit-anay kay DA Secretary Kiko Laurel kag Undersecretary Alvin Balagbag, ginpasalig ni Romualdez nga personal niya nga iduso ang mga hagna nga magapabaskog sang sini nga programa sa palaabuton nga ika-20 nga Kongreso.
Suno sa iya, indi lang ini presyo — isa ini ka promisa nga nagakinahanglan sang konkreto nga reporma.
Lakip sa mga layi nga ginaduso amo ang pag-amyenda sa Rice Tariffication Law agud liwat nga mahatagan sang gahum ang NFA sa pagkontrol sang presyo sang bugas. Gindugang sini nga importante nga buligan ang mga mangunguma paagi sa mas maayo nga binhi, kagamitan, kag pag-angkon sang merkado.
