ROXAS CITY—Patay ang 22-anyos nga lalaki matapos ginhatuk-hatok labu sang isa ka lalaki sa Barangay San Nicolas Tapaz, Capiz.
Ginkilala ang biktima nga si Amil Galagate kag residente sang Barangay Camburanan sang amo man nga banwa.
Base sa imbestigasyon sang Tapaz PNP nga nagpadulong sa tiangge nga tungang gab-i ang biktima agud magbakal apang nasal-an ini nga nagpanghaboy sa amo nga tiangge.
Mahibaluan nga gingwaan siya sang suspek nga si Perpekto Advincula, 30-anyos nga residente sang Tacloban, Leyte apang temporaryo nga nagapuyo sa nasambit nga lugar kag ginlabu gamit ang sanduko.
Apang antes ang insidente nagkaangkon pa sang pagbinaisay ang duha kag ginapahayag nga hubog ang biktima.
Nag-angkon sang madamo nga kapilasan sa lawas si Galagate nga posible gintunaan sang iya kamatayon.
Nagtuyo pa kuntani nga magpalagyo ang suspek apang nadakpan ini sa ginpatigayon nga hot pursuit operations sang mga otoridad.
Sa karon nakahunong na sa karsel sang Tapaz PNP ang suspek kag natalana nga pasakaan sang nagakaigu nga panumbungon.
