ROXAS CITY – Nagpanindugan ang presidente sang Hugpong Transport-Capiz nga indi sila pabor sa fuel voucher sang Land Transportation Franchising and Regulatory Board (LTFRB) nga ihatag sang gobyerno sa mga lehitimo nga Public Utility Jeepneys (PUJ’s) sa pungsod.
Suno kay Mr. Joebert Carandang, ginpahayag sini nga indi solusyon ang ihatag nga P5,000 nga ayuda sang ahensiya sa mga PUJ’s para masabat ang mga reklamo kag kabudlay sang mga operators kag drivers sang jeepneys.
Ginapakigbato sa gihapon sang transport sector sa probinsiya ang solusyon sa problema amo ang pagbasura sa oil deregulation law, tax reform law kag 10% excise tax nga nagapabudlay sa mga operators kag drivers sang PUJs.
Samtang ginlaragway naman ni Carandang nga pagmasaker sa ila nga palangabuy-anan ang pagphase out sa mga PUJs nfa kalakip sa modernization program sang gobyerno.
Nagapati si Carandang nga indi kinahanglan nga i-phase out ang mga daan nga PUJs sa baylo mahimuan man sang pamaagi para ma-upgrade ini.
