ROXAS CITY – Ginkompirmar sang pila ka mga Locally Stranded Individuals ukon LSI’s nga nakabati man sila masami sang huni sang “wakwak” kag “tiktik” sa Roxas City School For Philippine Craftsmen nga nagaserbi nga quarantine facility sang Barangay Lanot sining siyudad.
Ini ang ginpahayag sang wala na ginhingadlan nga LSI nga naka-quarantine sa nasambit nga lugar.
Suno kay alyas Nene nga normal na lamang ini mabatian apang ginkatingala na lamang nila nga nagkinagual na sa nasambit nga lugar.
Ini matapos ginaalegar nakakita sang “aswang” ang ila kaupod nga LSI nga mag-asawa kag lunsay mga residente sang Estancia, Iloilo sadtong Disyembre 25 sang gab-i.
Apang, gin-athag ni alyas Nene nga wala man ini sang may nakita nga “aswang” sa nasambit nga quarantine facility.
Nahibaluan nga matapos ang natabo naghinyo ang amo nga LSI nga i-pull-out na lamang ini sa nasambit nga pasilidad bangud sa kahadlok nga nabatyagan.
Gilayon man ini nga ginpahanugotan ni Punong Barangay Jocelyn Asis sang Barangay Lawaan sining siyudad sa pagpati nga residente man ini sang ila barangay.
Apang ulihi na natukiban nga indi mga residente sang amo nga barangay ang mag-asawa nga LSI’s rason nga ginkakibot ini sang nasambit nga opisyal.
Mahibaluan nga ang tiyo sang mag-asawa nga LSI’s ang nagproseso sang ila mga rekisitos sa Barangay Lawaan agud magpaidalom sang ila nga 14 day quarantine apisar nga indi man sila lunsay mga residente sang siyudad sang Roxas.
