TANZA SUR, Panay, Capiz – Arestado ang isa ka lalaki nga ginakabig nga high value individual ukon HVI sa ginpatigayon nga buy-bust operation sa Barangay Tanza Sur, Panay, Capiz.
Ang suspek amo si alyas Niño, 31-anyos, nalakip sa Provincial Priority Target List sang kapulisan sang July 9, 2026 kag residente sang Barangay Tabuc, Pontevedra, Capiz.
Sa interview sang Bombo Radyo kay Police Lieutenant Colonel Syril D.C. Punzalan, Chief sang Capiz Police Drug Enforcement Unit “CPPDEU”, iya ginpahayag nga nagresulta sa pag-aresto sa suspek ang ginpatigayon nga buy-bust operation sang mga katapo sang ila unit, sa bulig sang Panay Municipal Police Station.
Suno kay Punzalan, narekober sa operasyon ang apat ka heat-sealed transparent plastic sachet sang ginapatihan nga shabu, nga may kabug-aton nga 9.99 grams kag may Standard Drug Price nga P67,932.00.
Pahayag pa niya bilang dugang nga ibidensya narekober man ang 1 ka sachet sang ginapatihan nga shabu bilang buy-bust item, 3 ka sachet nga narekober sa iya possessyon, P1,100 buy-bust money, P1,000 boodle money, P100 bill kag nagkalain-lain nga non-drug items nga narekober sa operasyon.
Sa karon, yara na sa kustodiya sang Panay Municipal Police Station ang suspetsado para sa nagakaigo nga disposisyon kag magapanagtubang sang kaso nga paglapas sang Republic Act 9165 ukon Comprehensive Dangerous Drugs Act of 2002.
