PUNTA TABUC, Roxas City – Arestado ang High Value Individual kag Street Level Individual sa ginpatigayon nga buy-bust operation sa Barangay Punta Tabuc, Roxas City.
Matandaan nga natigayon ang madinalag-on nga operasyon sa bulig sang joint element sang Capiz Police Provincial Drug Enforcement Unit “CPPDEU” kag Roxas Component City Police Station “RCCPS”.
Ang suspetsado amo sanday alias Jun, 37-anyos, driver, residente sang nasambit nga lugar kag alias Bet, 33-anyos, residente sang Brgy. Tiza, Roxas City.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga narekober sa ila ang ginabulubanta nga 53 gramos sang suspected shabu nga may standard drug price sang 360, 400.00, 4,500 nga buy-bust money 4, 400 boodle money, kag 100 peso nga genuine peso bill.
Suno kay Garnica makabig nga HVI ang suspek bangud sa mabug-at nga pagka-involved sa kaso nga ginatubang niya base sa criteria sang law enforcement, samtang ang SLI isa ini ka buluhaton sang drug personality nga may yara sang localized drug personalities.
Pahayag pa niya ang operasyon ginbase sa ginatawag nga intelligence gathering, validation, operation planning agud nga masiguro ang impormasyon nagasunod sa established police operational procedure.
Sa karon nahibaluan nga yara ang duha ka indibidwal nga nakahunong sa RCCPS nga magapangatubang sang kaso may kaangtanan sa paglapas sang RA 9165 ukon Comprehensive Dangerous Drugs Act of 2002.
