Ginsumiter na sang International Criminal Court (ICC) ang ika-pito nga hagna sang ebidensya batok kay anay Presidente Rodrigo Duterte may kaangtanan sa kaso nga krimen batok sa katawhan para sa iya gin-alegar maduguon nga kampanya nga ‘war on drugs’.
Nahibaluan nga sang Mayo 30, nagsumiter sang dugang nga 129 items ang prosekusyon, magluwas sa 267 ka mga ebidensya nga ginsumiter halin sang nagsugod ang disclosure period sang Abril 30.
Suno kay ICC Prosecutor Karim Khan, nga yara sa temporaryo nga bakasyon samtang gina-imbestigaran para sa ginaalegar nga sayop nga pagginawi, ang kabug-usan nga numero sang mga dokumento sa ila relativity database mga 130,000 nga kinahanglan nga repasuhon antes ini bug-os nga ipahayag.
Tubtob sa Hulyo 1 ang tion sang prosekusyon sa pagsumiter sang tanan nga ebidensya nga gamiton sa hearing nga natalana sa Setyembre 23.
Matandaan nga gin-aresto si Duterte sang Marso 11 sa isa ka international warrant for crimes against humanity. Suno sa human rights groups, masobra 30,000 ka mga tawo ang napatay sa idalom sang iya kampanya kontra droga.
Sa pihak nga bahin, priso subong si Duterte sa headquarters sang ICC sa The Hague, Netherlands.
Talalupangdon nga sadtong Mayo, ginbasura sang ICC ang hingyo sang kampo ni Duterte nga i-disqualify ang duha ka ICC judges nga naga-uyat sang iya kaso.
