ROXAS CITY, CAPIZ- Ginlunsyar subong nga adlaw sang mga katapo sang mga kapulisan ang programa nga International Day Against Drug Abuse and Illicit Trafficking (IDADAIT), sa syudad sang Roxas kag sa mga Municipal Station sa bilog nga probinsya sang Capiz.
Sa interview sang Bombo Radyo kay Police Lieutenant Colonel Ricardo Jomuad Jr., Hepe sang Roxas City Police Station, ginpahayag nga ang nasambit nga programa ang may katuyuan nga ipalab-ot sa publiko ilabi nagid sa mga kabataan ang mga impormasyon natuhoy sa epekto sang iligal nga droga.
Dugang pa sini nga hugot nga ginapatuman sang mga kapulisan ang nasambit nga programa agud mapahilayo sa mga iligal nga aktibidad ang publiko kasubong sang pag-gamit kag pagbaligya sang iligal nga droga.
Nahibaluan nga sa probinsya sang Capiz, ilabi na syudad sang Roxas, madamo sang mga indibidwal ang nagapatigayon sang mga iligal nga aktibidad.
Samtang, mensahe naman ni Jomuad sa publiko, nga importante ang kooperasyon sang tagsa-tagsa agud mapabilin ang kalinong kag katawhay sa palibot.
With a report from Bombo Sunnie Mae Batencila
