Narekober na ang ikaduha nga black box sang eroplano sang Air India nga nag-crash sa Ahmedabad, India sang Hunyo 12 nga ginkamatay sang 279 ka tawo.
Sa isa ka pahayag, ang senior aide ni Prime Minister Narendra Modi nga si PK Mishra nagkumpirma nga ang cockpit voice recorder, nga nahamtang sa overhead instrument panel sa tunga sang duha ka piloto, nasapwan kag naseguro.
Madumduman nga ang una nga black box ukon ang flight data recorder ang narekober sang Biernes, isa ka adlaw matapos ang pagkahulog sang eroplano. Ang flight data recorder, nga yara sa tail section sang eroplano sang Air India, nagpabilin nga intact ukon wala nahalitan sang nag-crash ang eroplano.
Ginalauman nga mapadasig ang imbestigasyon sa gintunaan sang pagkahulog sang eroplano matapos nga makuha ang duha ka black box.
Madumduman nga isa lamang ka pasahero ang nakalampuwas sa 242 ka mga pasahero kag crew nga sakay sang Air India Boeing 787-7 Dreamliner samtang 38 ka mga tawo ang napatay sa duta ukon nabungguan sang eroplano sa residential hostel sang BJ Medical College pila ka tion matapos ini maglupad.
