ROXAS CITY – Naglab-ut sa 10 ka mga operasyon ang ginkasa sang mga kapulisan batuk sa iligal nga sugal sa probinsiya humalin sa bulan sang Enero tubtob Hulyo sini nga tuig.
Base sa ginpaguwa nga datos sang Capiz Police Provincial Office (CPPO) ang Roxas City, Pilar, kag Dumalag ang may yara sang tig 2 ka mga operasyon samtang tig-isa naman sa banwa sang Tapaz, Pontevedra, Panay kag Maayon rason nga natigayon madakpan ang kapin sa 54 ka mga indibdwal.
Ginpahayag ni Police Colonel Julio Gustilo Jr., Provincial Director sang CPPO nga nagnubo ang numero sang ila ginpatigayon nga operasyon sa iligal nga sugal kun ikumparar sang tinalikdan nga tuig bangud naghagan-hagan ang nagakahinabo nga sugal diri sa probinsya subong nga pandemya.
Nagapanawagan naman si Gustilo sang bulig sa publiko agud dalayon na nga matapna ang iligal nga sugal sa probinsiya.
