ROXAS CITY – Nag-angkon sang kapilasan sa magkatuhay nga parte sang lawas ang isa ka iloy kag duha sini ka kabataan matapos nga ginpangbuno sang ginapatihan kawatan sa National Housing Authority (NHA) sa Barangay Timpas, Panitan, Capiz.
Ginkilala ang biktima kay Sharon Duron Cortez, 37-anyos, isa ka online seller kag duha ka mga kabataan sini kag residente sang Pasig City, Metro Manila apang temporaryo nga naga-puyo sa nasambitan nga lugar.
Sa impormasyon nga nagikan sa Panitan Municipal Police Station, samtang nagakatulog ang mga biktima sang ginsulod ang mga ini sang wala pa makilal-an nga suspek.
Ginapahayag nga natalupangdan sang isa ka bata sang biktima ang pagsulod sang suspek sa ila puloy-an rason nga iya ini ginlantaw.
Apang, wala sini mahibaluan nga may dala nga matalom nga bagay ang suspetsado nga gingamit sa pagbuno sa biktima.
Nahimo man nga mabun-an ang iloy kag isa pa ka utod sini matapos nga mabatyagan ang insidente.
Madasig naman nga ginpadangat sang MDRRMO- Panitan ang mga biktima sa Bailan District Hospital apang gin-transfer sa Roxas Memorial Provincial Hospital para sa dugang nga pagbulong.
Sa karun padayon nga ginabulong ang mga biktima kag padayon ang imbestigasyon sang mga otoridad.
Ginalantaw nga pagpangawat ang motibo sang nagluntad nga insidente.
