ROXAS CITY – Ginsuguran na sang bag-o tukod nga ad hoc committee ang imbestigasyon natuhoy sa ginaalegar anomalya sa financial assistance sang gobyerno probinsyal.
Ini ang ginpahayag ni Vice Governor Jaime ‘Mitang’ Magbanua, sang mainterview sang Bombo Radyo.
Suno kay Magbanua, ang imbestigasyon ang santu sa mandato ni Governor Fredenil ‘Oto’ Castro agud mahatagan sang kaklaruhan ang mga alegasyon nga nagakahinabo kun sa diin gina-angut ang pila ka mga empleyado sa kapitolyo.
Ang investigative body ang ginakalakipan sang mga retired fiscals kag aktibo nga mga abogado sa probinsya sang Capiz.
Handa naman magkooperar ang Sanggunian sa imbestigasyon, gani gintipon sang bise gobernador ang mga empleyado sang nasambit nga talapatan agud ipaathag ang nagakahinabo kag magsugid sang ila nahibaluan agud madasig nga maresolba ang isyu.
Ginasiguro ni Magbanua nga mangin patas ang imbestigasyon kag magapanabat ang napamatud-an nga may sala, isa man ka opisyal, job order ukon kontrakwal man ini.
Samtang, wala pa gin-renew ang kontrata sang mga empleyado nga gina-angut sa ginaalegar anomalya tubtob wala pa nagaguwa ang resulta sang imbestigasyon.
Dugang pa ni Magbanua, bangud sa natabo may pila ka mga revision ang ginhimo pag-abot sa pagrenew sang kontrata sang mga empleyado sang gobyerno, isa na diri ang pag-renew sang kontrata kada tatlo ka bulan.
