Nagapadayon karon ang imbestigasyon sang mga otoridad sa pagkamatay sang isa ka utility worker matapos nga ginbuno kag ginhaboy sa sapa sang wala pa matumod nga mga suspek sa Atila Balgos Avenue, Barangay Banica, Roxas City.
Ini ang ginkompirmar ni Police Lt. Col. Ricardo Jomuad Jr., hepe sang Roxas City Police Station sang mainterview sang Bombo Radyo Roxas.
Suno kay Jomuad nga may yara na sila sang persons of interest nga posible nagpatay sa biktima nga si Jonathan Caloyloy sang Tanza Norte, Panay, Capiz.
Ginpahayag man sini nga ginahulat naman nila ang resulta sang DNA test sang dugo sang isa sa tatlo ka mga menor de edad kag dugo ng biktima.
Ini matapos nga nakitaan sang mga pulis sang dugo ang kuko sang menor de edad nga amo man nakakita sa nasambit nga biktima.
Nahibaluan nga nag-angkon sang patal nga pilas sa dughan ang biktima matapos ginbuno sang mga suspek.
Magluwas diri, matapos ini nga ginpatay kag ginhaboy sa sapa gintaban pa sang mga suspek ang P5,000 sini nga kwarta.
