ROXAS CITY – Aksidente nga pagkabunggo sang tricycle sa tulay ang nagaguwa karon sa imbestigasyon sang kapulisan sa banwa sang Maayon nga gintunaan sang kamatayon sang isa ka ginang kag pagkapilas sang iya bana sa Barangay Tapulang, Maayon, Capiz.
Ini ang ginpahayag sang Deputy Chief of Police sang Maayon PNP nga si Police Executive Master Sergeant Rey Jason Gimeno sang mainterview sang Bombo Radyo Roxas.
Suno kay Gimeno nga pauli na kuntani ang mga biktima nga sanday Mark Cacatian kag Joanne Belvis gikan sa ila paryente sa Barangay Sinabsaban, Cuartero sakay sa ila tricycle sang ginaalegar nadulaan sang kontrol sa manubela ang driver nga si Cacatian.
Bangud sang kabaskugon sang pagkabunggo tumampilak ang mga biktima sa suba.
Maswerte naman nga nakatakas si Cacatian apang wala na nakabutwa ang live in partner sini nga si Belvis.
Nahibaluan nga wala gilayon ma-estorya sang kapulisan si Cacatian bangud hinali na lamang ini nadula kag nagpanago.
Nahibaluan nga hubog si Cacatian kag madasig ang pagpadalagan sini sang tricycle rason nga wala nadiparahan ang kurbadahon nga porsyon sang dalan nga gintunaan sang aksidente.
Gin-athag naman ni FO3 Dennis Pabilico sang Maayon Fire Station nga narekober ang lawas sang biktima, pila ka oras ang nakaligad matapos ginpatigayon ang search and retrieval operation sa Sitio Pangpang, Barangay Piña, Maayon.
Suno kay Pabilico nga nasapwan na lamang nga nagalutaw na ang bangkay ni Joanne Belvis duha tobtob 3 kilometros ang kalayuon sa ginluntaran sang aksidente.
Nakit-an pa nga nagahabok ang tiyan sang napatay nga ginang kag may pilas ini sa panga.
Ginapatihan nga posible nabali ang tuhod sang biktima, rason sang iya pagkalumos.
Samtang nag-angkon naman sang pilas sa natuo nga porsyon sang iya nawong kag nawala nga tiil si Cacatian.
Nahibaluan nga bangud sa mabaskog nga impact sang pagkabunggo sang tricycle sa railings sang tulay aksidente naman nga nahulog si Belvis sa suba.
Samtang, indi naman makapati ang pamilya sang mga biktima sa natabo sa ila nga mga himata.
