ROXAS CITY – Ginpanindugan ni Capiz 1st District Board Member – elect Steve Contreras nga wala siya nag-traidor sa partido liberal ilabi na kay incumbent Governor Antonio del Rosario nga sa ulihi nalutos sang iya utod nga si Governor – elect Esteban Nonoy Contreras.
Ini ang kasunod sang talalupangdon nga facebook post sang utod ni Del Rosario nga si Mrs. Melanie Del Rosario – Arancillo kun sa diin kasubong ginaalegar sini nga may natabo nga pagpangtraydor sa mismo ka-partido sang gobernador sang nakaligad nga eleksiyon.
Ginpahayag ni Steve nga wala sini nakita sang personal ang amo nga facebook post apisar namensyunar pa didto ang iya pangalan apang nakaabot ini sa iya igtalupangod pinaagi sa iya nga mga supporters.
Apang panindugan ni Steve nga indi siya sang ‘guilty’ sa amo nga akusasyon bangud wala man ini nagtraidor sa ila partido.
Suno kay Steve, siya mismo ang nagboto sa pagka-gobernador kay Del Rosario apisar utod sini ang kasumpong sang gobernador.
Wala man ini suno sa iya sang gahom nga bag-uhon ang sample ballot nga ginhatag sang partido sa banwa sang Pontevedra bangud mismo si Del Rosario ang naghatag sini sa iya nga lideres sa amo nga banwa.
Mangin sa ila mga caucus suno kay Steve, wala sini ginamensyunar ang iya manghod bangud si Del Rosario ang ginatib-ong sa pagkagobernador sang ila nga grupo.
Aminado naman si Steve nga wala sang gin-endorso sa pagka-gobernador ang iya amay nga si Pontevedra Mayor Esteban Dodoy Contreras bangud miyembro man ini sang partido-liberal apang indi man niya mapaiway ang iya pagpalangga sa anak nga nagapapili sa pagka-gobernador.
Suno kay Steve nga para sa iya, nagpangibabaw ang pagpalangga sang pumuluyo sa iya utod nga si Nonoy rason nga nagdaog ini bilang gobernador sa iya kasumpong nga si incumbent governor Del Rosario.
