ROXAS CITY – Indi pabor ang isa ka ginikanan sa nangin pahayag ni Vice President kag DepEd Secretary Sara Duterte nga indi mandatoryo ang pagsuksok sang uniporme sa mga pampubliko nga buluthoan bangud posible nga mabutang sa alang-alang ang seguridad sang ila kabataan.
Sa pakig-angut sang Bombo Radyo kay Elbie Delima, residente sang Barangay Culasi sini nga syudad, kun indi mandatoryo ang pagsuksok sang uniform, posible nga makasulod sa buluthoan ang mga outsider ukon indi estudyante kag magtuga sang kinagamo ukon halit sa mga kabataan kaangay sang nagakahinabo sa luwas sang pungsod.
Dugang pa sini, nga dako nga kalipay kag bugal para sa mga nagatimakas nga mga ginikanan nga makit-an ang ila kabataan nga nagasuksok sang uniporme nga nagasulod sa buluthoan.
