Naghinay ang inflation rate ukon hulag sang presyo sang mga balaklon kag serbisyo sa pungsod sang bulan sang Setyembre 2024 suno sa Philippine Statistics Authority (PSA).
Subo kay PSA Chief at National Statistician Claire Dennis Mapa, nagnubo sa 1.9% ang inflation para sa bulan sang Setyembre humalin sa 3.3% nga inflation sang Agosto 2024. Ini man ang mas manubo kun ikumparar sa 6.1% inflation nga nabalhag sang Setyembre 2023.
Sa kabug-usan, nakapagkit sang average inflation ang pungsod nga 3.4% halin sa bulan sang Enero tubtob Setyembre 2024. Ini ang sulod gihapon sa target range sang gobyerno para sa bilog nga 2024 nga 2%-4%.
Paathag sang PSA nga ang pinakauna nga rason sang paghinay sang lebel sang inflation ang mas mahinay nga paghulag sa presyo sang ‘food and non-alcoholic beverages’ sa lebel nga 1.4% nga may 69.1% share ukon ambag sa pagnubo sang pangkabug-usan nga inflation sa pungsod.
Ang pinakauna nga nag-ambag sa pagnubo sang inflation sa ‘food and non-alcoholic beverages’ amo ang mas mahinay nga pagtaas sang presyo sang ‘cereal products’ nga may 4.9% inflation partikular ang bugas, utan, tubers ukon carrots, celery, kamote, patatas kag iban pa nga may -15.8% inflation kasubong sang kamatis.
Naghinay man ang inflation sa transportasyon partikular sa presyo sang gasolina kag diesel subong na sa LPG kag pagsuktanay sa kuryente.
Dugang pa ni Mapa sa National Capital Region (NCR) naman, nagnubo man sa 1.7% ang inflation sang Setyembre subong man sa guwa sang Metro Manila nga yara sa 2%.
