Napatay sa edad nga 24-anyos ang kilala nga Taiwanese beauty influencer nga si Guava Shuishui, ukon mas kilala bilang “Guava Beauty,” suno sa opisyal nga pahayag sang iya nga pamilya sa social media.
Nakilala si Guava Beauty sa iya mga tumalagsahon nga content kun sa diin matapos mag-review sang cosmetic products may mga eksena nga ginakaon ukon ginatilawan niya ang mga ini bilang kabahin sang iya nga “make-up mukbang” videos.
Madasig nga ginbubo sang reaksyon sa online community, ilabi na sa China kag Taiwan, ang balita sang iya hinali nga kamatayon sang May 24.
Sa pihak sang iya nga kasikatan kag masobra 12,000 followers, nagapabilin nga misteryoso ang rason sang iya nga kamatayon.
Nagtuga ini sang nanari-sari nga espekulasyon sa social media, ilabi na kaangut sang tumalagsahon niya nga content nga kaangay “ginakaon” niya ang mga make-up products.
May pila ka netizen nga nagpahayag sang pagkahangawa nga posible ang iya nga kamatayon may kahilabtanan sa pagkalason, apang hugot ini nga ginpanginwala sang iya nga mga abyan kag pamilya.
Suno sa mga malapit kay Guava Beauty, gin-athag sang mga doktor nga wala sang kahilabtanan ang kamatayon sini sa nasambit nga content.
Bangud sini, ginpahayag sang mga malapit kay Guava Beauty ang importansya sang online responsibility. Suno pa sa ila, ang mga sala nga balita kag pagpangguba nga komento ang nagtuga sang tuman nga stress kag kasubo sa pamilya sang influencer.
Ginganyat man nila ang publiko nga mangin mahalong sa pag-share sang impormasyon, kag respetuhon ang pribado nga pagpangasubo sang mga binayaan.
Nagbilin si Guava Beauty sang madinuagon nga panublion sa kalibutan sang digital content nga sang ulihi, ang iya nga isa ang isa ka pahanumdom sa tanan nahanungod sa matuod nga kabuhi sang mga online personalities, nga sa likod sang camera kag viral videos may mga matuod nga tawo nga may balatyagon, pamilya, kag inagyan sa kabuhi.
