Ginpagwa sang International Criminal Court (ICC) Office of the Prosecutor ang detalye sang kaso batuk kay anay Presidente Rodrigo Duterte.
Ang dokumento ang gin-file sang Office of the Prosecutors nga nagaunod sang mga krimen nga pagagamiton sang Pre-Trial Chamber.
Ang dokumento nga nagaunod sang mga panumbungon amo ang basehan para sa confirmation of charges.
Base sa dokumento, ginapasabat sang mga piskal ang anay presidente sa masunod nga mga panumbungon.
1. Murder as a crime against humanity sa syudad sang Davao sang siya pa ang alkalde sa tunga-tunga sang 2013 tubtub 2016.
2. Murder as a crime against humanity batuk sa “high value targets” sa nagkalain-lain nga lugar sa Pilipinas sang siya ang presidente humalin 2016 tubtub 2017.
3. Murder kag attempted murder bangud sa paglapas sa tawhanon nga kinamatarong sa mga ginpatigayon nga barangay clearance operations sa nagkalain-lain nga lugar sa pungsod sang siya ang presidente humalin 2016 tubtub 2018.
Ang mga piskal dugang nga nagpresentar sang 49 ka mga insidente nga nagasuporta sa kaso nga may kabug-usan nga 78 ka mga biktima, 19 ka mga biktima sa count 1; 14 ka biktima sa count 2 kag 45 ka biktima sa count 3.
Makita sa dokumento nga si Duterte ang yara sa likod sang nasambit nga mga kaso bangud sang pagpain sang pondo kag pagplastar sang mga tawo nga magapatunman sang iya ‘war on drugs’.
Kadungan sini, ginpaguwa sang prosecution ang “Pre-Confirmation Brief” nga nagahatag sang detalyado nga paathag sang mga prosekusyon sa mga ebidensya kag argumento nga nagasuporta sa mga kaso batok kay Duterte.
Matandaan nga natalana kuntani subong ang confirmation of charges hearing sang anay presidente, apang gin-postpone ini sa hingyo sang iya kampo bangud ginaalegar may yara sang health issues ang anay presidente kun sa diin indi sini madumduman ang mga hitabo nga baliskad naman sa mga statements nga ginapaguwa sang iya mga kabataan nga mabaskog ini kag aware sa mga nagakatabo.
