Isa ka empleyado sa Alicante, Spain ang napierde sa kaso matapos ginkasuhan sini ang iya amo bangud sa unfair dismissal.
Ang rason sang iya pagpahalin: ang sulitsulit nga pagkadto sa trabaho nga “tuman ka temprano.”
Suno sa report, ang babaye may batasan nga magsulod sa opisina sa alas 6:45 sang aga, bisan pa nga ang iya opisyal nga shift nagsugod sa alas 7:30 sang aga.
Ginrason sang delivery company nga nagtuga ini sang problema bangud wala siya sang mga hilikuton ukon trabaho nga dapat himuon sa sina nga tion.
Sang tuig 2023, ginhatagan siya sang paandam apang wala niya ini ginsapak kag nagpadayon subong sang kinaandan.
Bangod sini, ginpahalin siya sa iya posisyon bangod sang “serious misconduct.”
Sa desisyon sang korte, nagdampig ini sa amo.
Suno sa korte, ang pagkatig-a sang ulo sang empleyado sa pagsunod sa oras mahimo nga makabig nga “disloyalty,” “breach of trust,” kag “disobedience,” nga bastante nga mga rason para mapahalin siya.
