PILAR, CAPIZ – Gintupok sang kalayo ang isa ka puluy-an matapos nagluntad ang sunog kahapon nga adlaw sa Sitio Bat-os, Barangay San Ramon, Pilar, Capiz.
Ang amo nga puluy-an ang ginapanag-iyahan ni Nanay Remedios kag residente man sang nasambit nga lugar.
Sa impormasyon nga nakuha sang Bombo Radyo kay Nanay Remedios, tag-iya sang puluy-an, ginapahayag nga ang iya bata ang nabilin sa ila puluy-an nga nagadigamo para sa pamahaw sang iya lola sang nagluntad ang sunog..
Pahayag pa niya, nag-umpisa ang kalayo sa ila kusina kag gin-usisa man sini ang iya nga bata nga naglakat apang suno sa iya bata antes ini naglakat ginsektyar man sini ang dapog kag posible nga nagikan sa ginsaksak sini nga kuryente ang ginhalinan snag sunog.
Tuman ang kasubo sang pamilya bangud naubos ang tanan nila nga kagamitan kag wala gid ini sang may nasalbar.
Samtang, nagapanawagan naman si Nanay Remedios sang bulig agud makasugod ini liwat sa ila pangabuy-anan.
Sa karon, padayon pa ang imbestigasyon sang Pilar Bureau of Fire Protection BFP para mahibaluan ang gintunaan sang sunog kag ang kabug-usan nga kantidad sang kahalitan.
