ROXAS CITY – Gintupok sang kalayo ang warehouse sang kilala nga baligyaan sang Merchandise sa New Road, Barangay Banica, Roxas City takna alas 6:30 kagab-i, Enero 5, 2023.
Ginapanag-iyahan ang nasambit nga warehouse sang negosyante nga si Steven Chua, yara sa legal nga pang-edaron kag resisente sang Barangay Tanza, Roxas City.
Sa inisyal nga impormasyon nagikan sa mga otoridad, ginpahayag nga nag-ibwal ang kalayo nga naghalin sa dap-ong sang mga basura nga karton sa kilid sang warehouse sa diin madasig nga naglapta ang kalayo tubtob nalab-ot ang mga produkto sa sulod sang nasambit nga warehouse.
Gintinguhaan naman sang katapo sang Bureau of Fire Protection kag mga rescue volunteers nga masulod ang amu nga warehouse agud indi maglapta ang kalayo sa kaingud nga mga pamalay.
Matapos makontrol ang kalayo, halos indi naman matakuran ang madamol nga aso nga nagahalin mismo sa sulod sang warehouse.
Samtang, makaligad ang masobra duha ka oras nga pagpalong sang mga bombero sa nag-ibwal nga kalayo, gindeklarar sang BFP nga ‘under control’ ang kalayo takna alas 8:20 kagab-i.
Wala naman sang may nasalbar sa mga stocks sa nasambit nga warehouse kag wala pa matumod sang BFP ang kahalitan sang nasambit nga sunog.
Sa karon, padayon pa ang imbestigasyon sang katapo sang Bureau of Fire Protection sa nagluntad nga sunog.
