ROXAS CITY – Nagpabilin nga isa ka dako nga palamangkutanon kag indi makapati ang isa sa mga ginasaligan nga tawo sang negosyante nga ginpatay sa sulod mismo sang iya stall sa Teodoro Arcenas Trade Center (TATC) kahapon nga adlaw, Abril 24, 2024.
Mahibaluan nga nasapwan na lamang kahapon takna alas 11:30 sang aga ang duguon nga bangkay ni Romulo “Mulong” Pajonar , 61 anyos sang mismo tiayon sini sa likod nga porsyon sang ila nga stall malapit sa nakatambak nga sinako sang bugas sang nagdul-ong kun tani ini sang iya panyaga nga ginapatihan ginpatay takna alas 10 tubtob alas 10:30 sang aga.
Sa interview sang Bombo Radyo kay Rey Jaminoso isa sa mga tinawo sang biktima, ginsiling sini nga nagahalin sa ila puluy-an ang biktima mga alas 3:00 sang kaaganhon kag nagapauli alas 7:00 na sang gab-i.
Suno kay Jaminoso, isa lamang si Pajonar nga nagabukas sang ila stall kag nagabantay bangud masarangan man sini niya ang mga olubrahon sa ila tindahan kag indi na kinahanglan nga magkuha pa sang tagabantay.
Ginpahayag man sini nga isa ka maayo nga amo kag tawo si Pajonar bangud masobra na sang lima katuig ang iya pagtrabaho sa nasambit nga negosyante.
Wala man sila suno diri sang may nahibaluan ukon natandaan nga nangin kaaway sang biktima, gani dako na lamang ang ila kakibot sang nahibaluan ang nadangatan sini.
Dugang pa ni Jaminoso nga wala nagadala sang kwarta ang biktima kung magpadulong sa stall apang, may yara ini sang mga nasuksok nga mga bulawan nga alahas.
Sa karun, yara na sa isa ka punerarya ang bangkay sang biktima kag nagalaum ang mga ini nga mahatagan sang nagakaigo nga hustisya ang pagpatay sa nasambit nga negosyante.
