Ginakonsiderar sang Philippine National Police (PNP) nga mangin state witness ang isa sa mga suspek sa kaso sang pagpatay sa beauty pageant candidate nga si Geneva Lopez kag kahagugma sini nga Israeli nga si Yitshak Cohen.
Suno kay PNP PIO chief PCol. Jean Fajardo, importante ang mga ginbuyagyag nga impormasyon sang amo nga suspek nga nangin dalan agud marekober ang mga bangkay sang duha ka biktima sa quarry site sa Barangay Sta. Lucia, Capas, Tarlac sadtong tinalikdan nga Sabado, Hulyo 6, 2024.
Suno kay Fajardo, ang isa sa mga suspek nga si alyas “Jun-jun” ang nagmaneho sang salakyan kun sa diin sakay ang bangkay sang mga biktima nga sang ulihi nadiskubrehan sang mga otoridad nga sunog.
Paathag ni Fajardo, indi lamang sila magadepende sa panaysayon ni alyas “Jun-jun” kundi dapat nga may backup nga mga forensic evidence agud masiguro nga mapag-on ang kaso.
Ginpahayag pa ni Fajardo nga igasumiter nila sa korte ang tanan nga mga nagakadapat nga ebidensya kag dokumento para sa aplikasyon ni alyas “Jun-jun” nga mangin isa ka state witness.
Samtang, may yara naman sang ginhatag nga seguridad ang Special Investigation Task Group sa pamilya sang nagsungka nga suspek.
Una na nga ginpahayag sang Department of the Interior and Local Government (DILG) kag PNP nga ang mastermind sa pagpatay sa magkahagugma amo ang mga dismissed nga pulis nga sanday Michael Guiang kag Rommel Abuso.
