Gin-aprubahan na sang gobyerno sang Israel ang ceasefire kag hostage release deal sini sa Hamas sa Gaza.
Nagahatag ini sang ligwa agud dalayon na nga mangin epektibo ang kasugtanan subong nga adlaw sang Dominggo, Enero 19.
Ginhimo ang nasambit nga desisyon matapos ang pila ka oras nga diskusyon nga naglab-ot tubtob gab-i sang Biyernes.
Yara naman sa 2 far-right ministers ang nagpamatok sa nasambit nga kasugtanan.
Una na nga ginrekomendar sang Israeli Security cabinet ang pagratipika sa amu nga kasugtanan kag ginsiling nga ginasuportahan nila ang kadalag-an sang mga tinutuyo sa giyera, base man sa pahayag gikan sa opisina ni Prime Minister Benjamin Netanyahu.
Sa idalom sang ceasefire deal, pagahilwayon ang 33 ka Israelis nga bihag sang Hamas kabaylo sang ginatos nga Palestino nga priso sa mga prisohan sang Israel para sa una nga bahin sang kasugtanan nga magadugay sang anom ka semana.
Igaatras man sang Israel ang mga tropa sini gikan sa Gaza, pasugtan ang mga Palestino nga makabalik sa ila nga mga puluy-an kag tugutan ang ginatos nga humanitarian aid kada adlaw sa Gaza.
Magasugod naman sa ika-16 nga adlaw sang ceasefire ang negosasyon para sa second phase kun sa diin ginalauman ang full withdrawal sang Israeli troops kag pagpanumbalik sang tayuyon nga kalinungan.
Sa ikatatlo kag ulihi nga bahin sang kasugtanan amu ang reconstruction sang Gaza nga possible nga magalab-ot sang pila kag tuig kag ang pagbalik sa mga nabilin nga mga bangkay sang mga napatay nga bihag.
