ROXAS CITY – Ginahulat na lamang sang banwa sang Ivisan kag Maayon ang sabat sang Regional Inter-Agency Task Force (RIATF) matapos nga nagpadala man sila sang request nga nagahinyo sang “Time-Out” sa pagpapuli sa mga LSI’s sa probinsya sang Capiz.
Ini ang ginpahayag ni Provincial Disaster Risk Reduction and Management Office Head Judy Grace Pelaez sang mainterview sang Bombo Radyo.
Suno kay Pelaez nga naghinyo man ang duha ka mga alkalde sang nasambit nga mga banwa sa pagpauntat sa pagpapuli sa mga LSI’s agud nga makapahuway man ang ila tagsa ka mga medical frontliners.
Samtang, para sa mga kabanwahanan naman nga magabaton sang mga LSI’s kinahanglan sa gihapon ang mga ini magpaidalom sa 14 day quarantine apisar nga negatibo ang resulta sang ila swab test antes nakapauli sa probinsya.
Pag-abot naman sa biyahe sang mga airlines kag ferries gindugangan naman ini sang gobyerno probinsyal kasunod sang ila panawagan.
Mahibaluan nga nagsugod na ang Philippine Airlines sang ila nga special flights kahapon Disyembre 4 samtang sa Disyembre 15 naman sa Cebu Pacific.
Sa pihak nga bahin, nagalab-ot naman sa 69 ka mga kabaranggaya ang ginlubog sang tubig baha kasunod sang mamunog nga pag-ulan diri sa probinysa.
Apang sa karon nagapabilin na lamang sa 27 ka mga barangay ang ginabaha partikular ang mga rice fields samtang 42 naman ang nag subside.
Dugang pa sini nga wala naman sang mga evacuees ang nagapabilin tubtob subong sa evacuation center.
Nagpasalig naman si Pelaez nga makabaton sang bulig nagikan sa gobyerno probinsyal ang mga kabanwahanan nga naapektuhan sang baha partikular na ang Barangay Badiangon banwa sang Pres. Roxas, Capiz.
Samtang, nagapadayon sa gihapon ang search and rescue operation sang PDRRMO sa isa ka mister nga ginaalegar gin-anod sang baha sa suba sang Barangay Old Guia kag New Guia, Maayon, Capiz.
