ROXAS CITY- Naga-isahanon na lamang ang banwa sang Jamindan nga wala sang kaso sang African Swine Fever (ASF) sa sulod sang 17 ka mga Local Government Unit (LGU) sa probinsya.
Sa interview sang Bombo Radyo kay Dr. Leonel Abordo Capiz Provincial Veterenarian, ginpahayag sini nga padayon nga nagasipa ang kaso sang ASF sa pila ka mga kabarangayan sa probinsya sang Capiz.
Suno kay Abordo, naglab-ot sa 242 ka mga barangay ang apektado sang amu nga sakit sa diin base sa ila nga datos 3,805 nga mga baboy ang apektado, masobra 7,000 diri ang napatay kag kapin 2,640 naman ang nadisposed.
Sa nasambit nga numero sang mga nagkalamatay nga baboy, ginpahayag ni Abordo nga indi diri tanan positibo sa amu nga sakit bangud pila sa mga rason suno diri makit-an lamang sang mga hog raiser ukon manugbaboy nga maluya ang ila hinuptanan gilayon na lamang nila ini nga ginpatay agud mapuslan.
Bangud sini, yara sa masobra 50 porsyento nga mga barangay ang apektado na sang African Swine Fever (ASF).
Mahibaluan nga sadtong Mayo 19, nakabalhag ang banwa sang Sigma sang kaso samtang ang Cuartero kag Dao naman nakapagkit sang kaso sadtong Mayo 25 sa diin gilayon nga ginkuhaan sang mga sample ang ila tagsa ka mga hinuptanan kag didto nakumpirmar nga positibo sa makahalalit nga sakit sa baboy.
Ginpahayag man ni Abordo nga base sa padayon nga pagtaas sang kaso sang ASF, makabig nga yara na sa state of calamity ang probinsya.
Angut sini, magaresulta ini sang dako nga epekto sa mga pumuluyo pag-abot sa supply sang baboy.
Nagalaum man ang veteranian nga pinaagi sa palaabuton nga bakuna makabulig ini nga matapna ang amu nga sakit.
Mensahe ni Abordo sa tanan nga mga hog raiser kag pumuluyo nga ipabilin nga matinlo ang mga tangkal sang ila baboy kag masami nga mag-dissenfect ilabi na kun ginapadulungan sang mga nagkalain-lain nga mga manugbakal.
