ROXAS CITY – Ginhinyo sang Sangguniang Panlalawigan nga ibalik sa Provincial Development Council (PDC) agud i-revise ang pagkabit sang tinaga nga “kabalaka” sa mga proyekto sang probinsya.
Ini ang ginpahayag ni Mr. Antonio Arbis, provincial budget officer, sang mainterview sang Bombo Radyo.
Suno diri, wala problema sa executive department kun igapa-revise ang tinaga nga “Kabalaka” sa title sang programa sang gobyerno, kaangay sa “Kabalaka Scholarship program”, ini bangud ngalan lang ang pagaislan kag ang programa ara sa gihapon.
Posible, sa 2022 pagaislan ini sang “Capiz Scholarship program.”
Ginklaro man sini nga sa karon, indi matandog ang ginsuhestyon sang Sanggunian nga 20% development nga buhinan ang pondo sa pagpakay-o sang mga covered gyms ukon evacuation center, sa baylo sang hospital services.
Matandaan nga gin-apply ang “Kabalaka” sa Comelec agud mangin lokal nga partido, nga amu ini ang rason sa pagsuhestiyon sang mga katapo sang provincial board nga ibalik sa lebel sang PDC.
Sa pihak nga bahin, ginpahayag man ni Arbis nga sa Disyembre 16, may palaabuton nga bonus ang casual kag regular nga empleyado sa Kapitolyo.
