ROXAS CITY – Kumpirmado nga may yara sang foul play ang kamatayon sang 63-anyos nga lalaki nga nasapwan patay sa Capricho II, Barangay Tanque, Roxas City.Ini ang ginkompirmar ni Police Lieutenant Colonel Joe Martin Fuentes, ang Medico Legal Officer sang PNP-Regional Crime Laboratory sang mainterview sang Bombo Radyo.
Ginkilala ang biktima nga si Joselito Baltazar sang nasambit nga lugar.
Suno kay Fuentes nga naguwa sa resulta sang autopsy examination nga may yara pilas sa leog tuga sang pagbuno kag pila ka mga parte sang lawas.
Bangud diri, ginapahayag nga may yara sang posible persona nga nagsulod sa panimalay sang biktima bangud nga nagalinapta ang mga kagamitan sini kag narekober ang kutsilyo sa babaw sang iya katre.
Matandaan nga nasapwan na lamang ni Junjun Dela Cena ang biktima sa kusina sa sulod sang ila balay nga naka-boxer kag wala na sang kabuhi.
Sa interview sang Bombo Radyo Roxas kay Dela Cena nga magadul-ong ini kuntani sang bill sang kuryente sa biktima apang ginkatingala sini kun ngaa wala nagasabat rason nga nagpalapit ini sa pirtahan sang balay kag nakasimhot sang mabaho rason nga iya ini gintsekyar kag nakita ang bangkay sang biktima.
Mahibaluan nga yara na sa idalom sang state of decomposition ang lawas sang amo nga biktima.
Sa karon, nagapadayon ang imbestigasyon sang mga otoridad sa nagluntad nga insidente.
