Kapin 1,000 public schools sa pungsod ang ginpaiway ang pagsugod sang klase nga nakatalana subong nga adlaw, Hulyo 29, 2024.
Base sa datos sang Department of Education (DepEd), nagdangat sa 979 nga buluthuan sa gakalain-lain nga parte sa rehiyon sa pungsod ang gin-postpone ang pagsugod sang School Year 2024-2025.
Ini ang ginalakipan sang 452 nga pampubliko nga buluthuan nagikan sa Region III, 231 gikan sa Region I, 225 ang nagikan sa National Capital Region, 67 ang gikan sa Region IV-A kag 4 naman ang nagikan sa Region XII.
Suno sa DepEd, ang pagpaiway sa klase amo agud matalupangdan ang pagpanglimpyo kag rehabilitasyon sa mga buluthuan nga naapektuhan sang Bagyong Carina kag Habagat.
Sa karon, padayon naman nga ginaberipika sang DepEd Regional Offices ang mga buluthuan nga sigurado nga indi magsugod sang klase subong nga adlaw sang lunes.
Samtang, base sa enrollment monitoring sang DepEd, nagdangat na sa kapin 19,268,747 ang nag-enroll nga mga estudyante para sa SY 2024-2025.
Ginalauman naman sang nasambit nga departamento nga magadamo pa ang mga enrollee sa mga masunod nga adlaw bangud madamo pa ang nagahingabot mag-enroll matapos magsugod ang pasukan.
