ROXAS CITY – Target nga ubuson sang Department of Social Welfare and Development (DSWD) – Region 6 ang kapin P19-M nga nabilin nga pondo para sa cash assistance sang mga student in crisis sa bug-os nga Western Visayas sa masunod nga Sabado, Setyembre 24.
Ini ang ginkumpirmar ni Atty. May Rago Castillo, tagpamaba sang DSWD Region 6 sang mainterview sang Bombo Radyo.
Ginsiling sini nga mas o menus 7,000 nga mga estudyante ang target nga mahatagan sang ayuda.
Ginklaro ni Castillo, nga ang numero sang mga benepisaryo sa kada probinsya ang nakadepende sa kadamuon sang numero sang estudyante.
Ini ang may kaangtanan sa nababaton nila nga reklamo kun ano ang rason sang manubo nga numero sang benepisaryo sa Capiz kumparar sa iban nga probinsya.
Ba-se sa datos sang DSWD sang nanligad nga Sabado, nagrelease ang ahensya sang P7-M nga pondo para sa 2,432 nga mga estudyante kun sa diin masobra 300 lang mga benepisaryo ang nahatagan sa Capiz.
Nagpanindugan man ini, nga strikto ginapatuman sang ahensya ang no walk-in policy kag ang nakabaton lamang sang mensahe ang magpadulong sa releasing sites nga iga-anunsyar sang DSWD.
