Ginwasak sang Philippine National Police (PNP) ang kapin P43 milyon nga balor sang mga tanom kag produkto sang marijuana sa ginpatigayon nga sunod-sunod nga operasyon sa Cordillera Administrative Region (CAR) halin Abril 26 tubtob Mayo 2.
Suno sa PNP, naglab-ot sa 18 ka marijuana eradication operations ang ila ginpatigayon sa sulod sang isa ka semana nga nagresulta sa pagkadula sang ginabanta P43.679 million nga balor sang ilegal nga droga.
Kadam-am sang mga operasyon ang ginpatigayon sa Benguet, samtang may kapareho man nga mga operasyon sa Kalinga kag Mountain Province.
Samtang, ginpangwasak man ang 183,034 ka fully grown nga tanom sang marijuana, 84,000 ka seedlings, kag 30,940 gramos sang pinauga nga dahon kag fruiting tops.
Pinakadako nga balor sang nawasak amu ang marijuana nga na record sa Mountain Province nga naglab-ot sa P31.36 milyon, gin sundan sang Benguet nga may P10.71 milyon kag Kalinga nga may P1.6 milyon.
Suno kay PNP chief Police General Jose Melencio Nartatez Jr., ginapakita sang sini nga mga operasyon ang mabakod nga kampanya sang kapulisan batuk sa ilegal nga droga.
