ROXAS CITY – Kasubong nga ginabaton na lamang sang punong barangay sang Barangay Inzo Arnaldo Village, Roxas City ang verdict ukon desisyon sang mga katapu sang Sangguniang Panlungsod angut sa anum ka bulan nga suspension bangud sa kaso nga grave misconduct kag serious dishonesty.
Sa exclusive interview sang Bombo Radyo Roxas kay Kapitan Einstein Okpora, ginpahayag sini nga wala na siya sang plano nga i-apelar ang desisyon sang konseho sang syudad kag ginarespeto na lamang ini.
Suno kay Okpora nga apisar wala pa sini mabaton ang official document gikan sa Sangguniang Panlungsod, ginalauman na sini ang amo nga verdict bangud may lamud pamulitika ang nasambit nga kaso kag paghingabot sa iya liderato.
Apang nagpamat-ud ang opisyal nga leadership call ang iya ginhimo nga pagkuha sa isa ka Locally Stranded Individual (LSI) nga residente sang nasambit nga barangay sa Congressman Ramon A. Arnaldo High School (CRAAHS) nga nagaserbi quarantine facility sang Oktubre 2020, bangud katuyuan lamang sini nga maproteksyunan ang general welfare sang mga pumuluyo.
Gin-athag pa sini nga negatibo man ang resulta sang swab test sang amo nga LSI.
Para kay Okpora nga harsh penalty ang nangin verdict sa iya kaso apang nagapati sa kaalam sang mga katapu sang City Council.
Ginpanindugan pa sang punong barangay nga wala na siya mahadluk sa kasubong sini nga suspension bangud ang importante nga nahibaluan sini nga tama ang iya ginhimo nga aksyon kag para sa kaayuhan sang mga pumuluyo.
Ginpasalig man sini sa mga pumuluyo sang Barangay Inzo Arnaldo nga apisar indi siya ang magaserbe nga punong barangay sa ila lugar sa sulod sang anum ka bulan, apang padayon ini nga magapanerbisyo sa iya mga constituents kag kun kinahanglan nila sang bulig, handa siya magbulig sa kutob sang iya masarangan.
Samtang ginpasiguro man sini sa magatal-us sa iya sa pagka-barangay kapitan nga mangin mahapos kag matawhay ang transition process kag lauman nga i-turn over sini ang mga dokumento nga kinahanglanon.
