ROXAS CITY — Ginpapanaugan sang anum ka bulan kag isa ka adlaw nga suspension sang Office of the Ombudsman – Visayas si Punong Barangay Jonifer Daniel Jr., sang Barangay Parian, Sigma, Capiz bangud sa anomaliya sa implementasyon sang Emergency Shelter Assistance ukon ESA.
Ginpasaka sa ahensiya ang reklamo sang residente nga si Antonio Degoma sang iya matukiban nga pila sa mga benepisyaryo sang ESA ang malapit nga himata sang punong barangay bisan pa nga wala maguba ang ila puluy-an sang magpanalasa ang Bagyo Yolanda sa Capiz sang tuig 2013.
Magluwas sa suspensyon, ginrekomendar man sang Ombudsman nga mapasakaan sang kaso nga paglapas sa RA 3019 ukon Anti- Graft and Corrupt Practices Act si Daniel sa nagakaigo nga korte.
Mahibaluan nga ginreklamo ni Degoma ang pagbaton sang asawa sang punong baragay sang P30,000 nga ESA sa pihak nga nagalumon lamang sila sa balay sang iya iloy nga si Laurencia Daniel.
Magluwas sa asawa ni Daniel, nakabaton man sang P30,000 ang iya iloy nga tag-iya sang balay nga ila gina-istaran apisar nga ini ang partially damaged lamang kun sa diin P10,000 lang ang ginahatag sang Department of Social Welfare and Developmant.
Magluwas sini, ginreklamo man ni Daniel nga pila ka mga katupad balay sini ang pwersahan nga ginkaltasan sang tig-P5,000 sa ila nabaton nga P30,000 sa pagpatigayon ni Barangay Kagawad Jenevey Valmoja.
Apang ginbasura sang Ombudsman ang reklamo batuk kay Valmoja bangud wala ini makitaan sang probable cause.
