ROXAS CITY – Ginpanginwala ni Kapitan Diosana nga may pamulitika kag may pinilian siya sa iya ginpanglista nga malakip sa cash for work nga programa sang DSWD-kalahi, kabaliskaran sang ginareklamo sang iya mga pumulyo.
Sa interview sang Bombo Radyo kay Punong Barangay Myerna Diosana, kapitan sang Barangay bahit banwa sang Panay, suno sa iya wala sang kamatuoran ang alegasyon sang pila ka mga pumuluyo bangud ginba-se niya lang sa monitoring kag guidelines sang DSWD ang iya pagpili kun sa diin kubos nga solo parents, balik-probinsya, kag nagalumon lamang ang kwalipikado.
May age limit man sang 21 tubtob 59-anyos ang mahimo malakip rason nga wala nalista ang mga senior citizen nga nagareklamo.
Kaangut diri, ang tatlo ka miyembro nga nakabaton sa isa ka pamilya amu ang nagikan sa Manila nga lakip sa balik-probinsya rason nga ginprayoridad niya ini.
Ginpunto pa ni kapitan nga 88 lamang ang ginapangayo sang DSWD-kalahi kag kun sarang niya nga madugangan kag malakip ang masobra 500 nga populasyon sang ila barangay, himuon niya ini bangud naluoy man siya, apang mas ginpili niya ang pinaka-nagakinahanglan kag kwalipikado.
Dugang pa ni kapitan, ilakip niya sa masunod nga programa ang mga wala nalista kag kun may pamangkot ukon reklamo ang iya pumuluyo, magpadulong lamang sa iya agud mahatagan niya sang sabat.
