ROXAS CITY – Ginpalab-ot na ni Punong Barangay Romeo Doloso sa Committee on Good Governance sa konseho sang siyudad ang reklamo sini sa Sangguniang Kabataan (SK) Chairperson sang ila barangay.
Mahibaluan nga gindangop ni Doloso ang reklamo sini sa konseho sang siyudad bangud sang kapaslawan ni SK Chairperson Herra Huecas nga makapakita kag magtambong sa ila serye sang sessions sa sulod sang halos anom na ka bulan.
Ginpahayag ni Doloso nga sang nakaligad nga bulan sang Enero pa sang ulihi sila naghinalaay ni Huecas kag ginpahibalo siya nga magatulak si Huecas padulong sa pungsod Japan.
Suno kay Doloso, ginpanugyanan niya si Huecas nga mag-abiso sa talatapan sang Department of Interior and Local Government (DILG) apang sa baylo nga sundon, ginhambalan lamang siya ni Huecas nga indi niya ini pagdalahigon.
Panindugan ni Doloso nga ang wala pagpakita ni Huecas sang masobra anom ka bulan ang ‘ground’ agud mapahalin ini sa pwesto sandig sa Section 18 sang Republic Act 10742 ukon SK Reform Act.
Sa pagpangusisa ni Doloso natukiban nga naga-eskwela sang foreign language si Huecas sa pungsod Japan.
