ROXAS CITY – Makabig nga bugal sang kapulisan sa probinsya ang madamo nga accomplishment nga ila na-angkon sa isa lamang ka semana sini nga bulan sang Agosto.
Sa interview sang Bombo Radyo kay PMAJ. Ruby Magallanes, Tagpamaba sang CPPO, iya ginpahayag nga ang nasambit nga accomplishment bangud sa ila ginpatigayon kag mas ginpasangkad nga operasyon batuk sa nagkalain-lain nga iligal nga buluhaton.
Ginpatpat sini ang mga nagkaladakpan kun sa diin sa iligal nga droga dakop ang 3 ka persona sa duwa ka operasyon nga ginkasa sang Roxas Component City Police Station Drug Enforcement Team.
Kaangut diri, nakumpiskar ang mas o menus 159 gramos sang shabu nga may estimated drug value nga P1,086,000.
Pag-abot sa iligal nga pagsugal, nadakpan ang 1 ka persona sa banwa sang Dumalag nga nagresulta sa iya pagkaaresto.
Sa operasyon naman sa pagpangdakop sa mga wanted person kabulig ang pila pa ka operatiba sa tagsa ka unit, may yara sang 12 tanan ka persona ang naserbehan sang mandamiento de aresto kun sa diin apat diri ang most wanted person samtang 8 naman ang other wanted person.
Gikan ini sa magkatuhay nga MPS sa probinsya kag nagapanguna diri ang Roxas City PNP.
Sa environmental laws and protection, may yara sang 4 ka operasyon ang kapulisan batuk sa iligal nga pagpangisda nagikan sa coastal areas sa banwa sang Panay kag Pilar, nagresulta ini sa pagkaaresto sang 7 ka mga indibidwal kag ginkumpiskar ang ila mga fishing boats kag iban pa nga kagamitan.
Pinakamadamo naman suno diri ang ila operasyon nga Tokhang Kontra Armas Luthang (TKAL), kun sa diin kabug-usan sang 36 ka mga firmearms kag explosives ang boluntaryo nga ginsungka sa magkatuhay nga estasyon sang kapulisan.
Nagsungka man ang 9 tanan ka anay rebelde, pinaagi ini sa pagpanikasog sang PPDEU-Capiz Provincial Mobile Force Company kag Jamindan MPS.
Ginsiling ni Magallanes nga ang mga accomplishment nga ini nagapakita lamang nga matuod kag sinsero ang kapulisan sa ila misyon kag handom nga maproteksyunan ang komunidad kag mapabilin ang kalinong kag katawhay sa bilog nga probinsya.
Nagapati siya nga maganubo ang krimen pinaagi sang ila nagkalain-lain nga operasyon, mas masangkad nga law enforcement activities, police visibility, pag conduct sang mobile patrol, amu man ang pagpahamtang sang pulis sa barangay.
Bilang representante ni Provincial Director PCol. Winston De Belen, nagapasalamat siya sa tanan nga kapulisan sa probisya bangud sa sinsero ang mga ini nga nagaserbisyo.
Nagapasalig si Magallanes nga indi magpabaya ang kapulisan sa ila sinumpaan nga serbisyo kag lauman nga indi sila mag-untat patuman sang kasuguan nga wala sang kahadlok kag pinilian.
