ROXAS CITY, CAPIZ- Yara na sa 12 ang kaso sang dengue nga napagkit sa Barangay Tiza, Roxas City subong nga tuig.
Sa interview sang Bombo Radyo kay Punong Barangay Daz Noel Alovera sang nasambit nga lugar, iya ginpahayag nga kalabanan sa mga nakaangkon sang amo nga balatian amo ang mga kabataan apang, ang iban sa karon yara na sa maayos nga kondisyon.
Dugang pa sini, ginapasalamat nya man nga manubo lang ang rekord sang amo nga balatian sa subong nga tuig kun ikumparar sang tinalikdan nga tuig nga nakapagkit ini sila sang kapin 40 ka mga kaso.
Pahayag pa sini, nga nangin epektibo gid ang ila nga mga aktibidad nga ginapatigayon sa barangay kaangay sang pagpanglimpyo sa palibot kada las 4:00 sa hapon.
Nahibaluan nga nalakip sa clustering sa amo nga balatian nga dengue sa Roxas City ang amo nga barangay.
Samtang, mensahe naman sini sa mga pumuluyo nga iya nasakupan nga sa gihapon ipabilin gid ang katinlo sang palibot agud malikawan ang kasubong nga balatian.
With a report from Bombo Jessa Mae De Los Santos
