ROXAS CITY, CAPIZ – Naglab-ot na sa 978 ang kabug-usan nga kaso sang dengue sa probinsya sang Capiz halin Enero 1 tubtob Agosto 2, 2025.
Sa interview sang Bombo Radyo Roxas kay Jezza Lorraine Porras, Population Program Officer 1 sang Capiz Provincial Health Office, iya ginpahayag nga apisar may nabalhag nga 21 ka panibag-o nga kaso subong nga semana, mas manubo ini sang 25.23% kun ikumpara sa kapareho nga period sadtong 2024 nga may 1,308 nga kaso.
Suno kay Porras, apat na ka indibidwal ang napatay gikan sa mga kumpirmado nga kaso, katumbas sang 0.41% case fatality rate.
Pinakaapektado nga age group ang mga yara 10 tubtob 19-anyos, nga nagabug-os sa 27.4% sang kabug-usan nga kaso.
Base sa datos, pinakamataas nga kaso sa Roxas City nga may 350, ginsundan ini sang Tapaz nga may 114, kag Dumarao nga may 50.
Pinakadaku nga pagtaas sang kaso ang nabalhag sa Tapaz nga 93.22%, samtang pinakadaku nga pagnubo amo ang sa Sigma nga may 70.48%.
Padayon naman nga gina-monitor sang Provincial Health Office ang clustering sang dengue sa pila ka lugar kasubong sang Dao, Dumarao, Dumalag, kag Roxas City, kun sa diin may tatlo ukon masobra pa nga kaso sa pareho nga lugar sa sulod sang apat ka asud-asod nga semana.
Panawagan sang natungdan sa publiko nga magpanglimpyo sa palibot kag kakason ang mga posible nga pamugaran sang lamok agud malikwan ang paglapta sang dengue.
– Interviewed by: Bombo Lynd-C Bade
