ROXAS CITY – Dako ang gin-nubo sang kaso sang balatian nga dengue sa probinsiya sang Capiz subong nga tuig 2020.
Ini ang ginpahayag sang Development Management Officer IV sang Department of Health (DOH) Capiz nga si Mr. Joefry Espiritu sang mainterview sang Bombo Radyo.
Suno diri nga 94 porsyento ang gin-nubo sang kaso sang dengue sa probinsiya humalin Enero tubtob Agosto sini nga tuig 2020 kun ikomparar sa kapareho nga period sang nakaligad nga tuig 2019.
Mahibaluan nga 4, 644 ka mga kaso sang amo nga balatian ang napagkit sang nakaligad nga tuig samtang 274 lamang ang napagkit sini nga tuig.
Kadamuan suno diri sa mga nakaangkon sa nasambit nga balatian ang nagapang-edaron sang 13 tubtob 18 anyos.
May pinakadamo nga kaso ang Roxas City nga may 101 ka mga kaso samtang may pinakamagagmay naman nga kaso ang Jamindan nga may yara lamang sang isa.
Dako nga bulig suno diri ang pagtenir lamang sa balay sang mga pumuluyo bangud mas may oras sila sa pagpaninlo sa guwa kag sulod sang ila balay.
Tuman ka importante suno diri ang 4 o’clock habit kun sa diin sa tagsa ka hapon, kinahanglan nga maninlo sa palibot.
Nagpanugyan man ini sa publiko nga magsuksok sang malaba nga mga panapton kag likawan ang mga lugar nga masami ginapamugaran sang lamok.
Liwat man sini ginpaabot ang importansiya sang 4S strategies agud makalikaw sa dengue nga amo ang Search and destroy mosquito breeding places; Secure self-protection; Seek early consultation; kag Support fogging/ spraying only in hotspot areas.
