ROXAS CITY – Nagdangat na sa kabug-usan nga 368 ang kaso sang dengue sa probinsya sang Capiz ba-se sa monitoring sang Department of Health (DOH) Capiz sumugod Enero 1 tubtob Hulyo 16.
Ini ang gintuad ni Mr. Jeoffrey Espiritu, Development Management Officer IV kag tagpamaba sang Department of Health (DOH)-Capiz sang ma-interview sang Bombo Radyo.
Suno diri, 164% ang gintaas sang kaso sang dengue subong nga tuig kag padayon pa nga nagatinaas ikumparar sang nakaligad nga tuig nga may yara lamang sang 139%.
Ginsiling sang tagpamaba, sa week 27 sang ila pagbantay may yara sang 14 ka kabarangayan ang may “clustering” ukon may masobra 3 ka mga kaso sang nasambit nga virus sa sulod sang isa ka semana kun sa diin ang Brgy. Baybay ang “hotspot” ukon may pinakamataas nga clustering sa syudad.
Dugang pa ni Espiritu, nagpanghatag na sila sang larvicide sa mga barangay apang mas maayo sa gihapon suno diri nga magpanglimpyo ilabi na sa pagtapna sa bahin nga may stagant water nga amu ang breeding ground sang itlog sang lamok kag kiti-kiti, limpyuhan ang mga magamhon, kag takpan ang mga naka-stock nga tubig.
Ginpakigbahin man sini ang nagkalain-lain nga sintomas sang dengue nga gintunga sa duwa, ang without warning signs kag with warning signs.
Sa without warning signs, mabatyagan ang lagnat, sakit sang ulo, lawas, maskulo, kasu-kasuhan, pagpalanakit sa likod sang mata, wala gana sa pagkaon, pagpalanuka, diarrhea, kag rashes sa panit.
Samtang ang dengue with warning signs naman mabatyagan ang lagnat, pagsakit sang tiyan, wala untat nga pagsuka, pagdugo sang ilong ukon ngislo, kag pagnubo sang blood platelet count, kun may kasubong nga sintomas, indi na ini pagpadugayon kag gilayon magpadulong sa pinakamalapit nga ospital.
Panugyan ni Espiritu sa pumuluyo, magpanglimpyo adlaw- adlaw bangud indi makuha sa isa ukon laka nga pagpanglimpyo ang virus nga dengue, magkooperar sa aktibidades sa pagtapna sini, kag mangin responsable nga pumuluyo.
Sundon man suno diri ang 4s, pagtapna sa gina-istaran sang lamok, pagprotekta sa kaugalingon pinaagi sa pagsuksok sang mahaba nga panapton kag pagbanyos sang mosquito repellent lotion, magkonsulta sa doctor kun may mabatyagan nga sintomas, kag ang ulihi say-YES sa fogging sa tion lamang sang dengue outbreak.
