Nagdangat na sa 27 ang kaso sang fireworks-related injuries base sa pinakaulihi nga report kag mas mataas sang 43% kun ikumparar sadtong tuig 2023.
Sa interview sang Bombo Radyo sa Information Officer sang PHO-DOH Capiz nga si Mr. Joefrey Espiritu, ginpahayag sini nga naglab-ot na sa 27 ka mga kaso sang nalukpan ang ila napagkit sumugod sadtong Disyembre 21 204 tubtob Enero 2 subong nga tuig 2025.
Suno kay Espiritu, sa nasambit nga numero nakapagkit diri sang 3 ka kaso ang banwa sang Cuartero, tig-isa naman sa banwa sang Dao, Dumalag, Dumarao, Ivisan,Jamindan, Pilar, Pontevedra, kag Tapaz samtang ang Mambusao may yara sang 3 ka kaso, Sigma may 3 kag ang syudad sang Roxas ang may yara sang 10 ka mga kaso kag may yara pa sang isa ka gina-verify nga kaso halin sa Roxas City.
Samtang nagapabilin nga wala sang kaso amo ang banwa sang Maayon, Panay, Panitan, President Roxas kag Sapian.
Mahibaluan nga 4 diri ang nabiktima sang gingamit nga Boga, 2 sang whistle bomb, grenade – 1, Five Star – 2, Bilong-bilong – 1, Kamara – 3, Kwitis – 5, Libintador – 5, Triangle – 2, kag unknown nga kaso – 1.
Ginpahayag man sang tagpamaba nga 16 sa mga ini ang active ukon sila mismo ang nagpalupok kag 11 diri ang nadalahig lamang.
Napagkit man sang ahensya nga 13 sa nasambit nga numero ang naka-inum sang makahulubog nga ilimnon kag 10 naman ang wala sang natabo ang insidente.
Suno pa sa pahayag nga base sa mga injury kalabanan sini may mga samad sa lawas, kamot kag abaga kag may yara sang 4 ka eye injury.
Sa karon, nagapabilin ang 2 ka mga biktima sa ospital para sa nagakaigo nga pagbulong.
