ROXAS CITY, CAPIZ – Nagsaka sang 80% ang numero sang kaso sang leptospirosis sa probinsya sang Capiz halin Enero 1 tubtob Agosto subong nga tuig, base sa datos sang Capiz Provincial Health Office.
Sa interview sang Bombo Radyo Roxas kay Population Program Officer I Jezza Lorraine Porras, iya ginpahayag nga naglab-ot na sa 36 ang nabalhag nga kaso sang sakit, mas mataas kun ikumpara sa kapareho nga period sadtong 2024 nga may 20 lamang ka mga kaso.
Gikan sa kumpirmado nga mga kaso, walo na ang napatay subong nga 2025.
Panugyan sang natungdan sa mga pumuluyo nga ipabilin nga malimpyo ang palibot, likawan ang pagtambak sang basura kag tubig nga mahimo nga istaran sang mga ilaga, magsuksok sang proteksiyon sa tiil ilabi na kun kinahanglan mag-agi sa baha, kag gilayon nga magpakonsulta sa pinakamalapit nga health center ukon ospital kun nakaeksperyensya sang mga sintomas kasubong sang lagnat, pagpalanakit sang kaunuran, yellowish nga panit kag mata agud mabulong gilayon ang posible nga komplikasyon sang leptospirosis.
– Interviewed by: Bombo Lynd-C Bade
