Roxas City – Dako ang pagpati ni Lieutenant Colonel Vicel Jan Garsuta Officer In Charge Deputy Public Affairs Officer sang 3rd Infantry Division nga naganubo na ang numero nga miyembro sang gina-alegar Communist Terrorist Group (CTG) sa banwa sang Tapaz.
Ini matapos nga nagbayluhanay sang lupok sang armas luthang ang katapo sang 12th Infantry Batallion sang Philippine Army sadtong Sabado sa Barangay Santa Petronilla, Tapaz, Capiz.
Sa interview sang Bombo Radyo kay Garsuta ginpahayag sini nga yara sa 5 ka mga personalidad nga miyembro sang CTG ang ila nakontra nga 2nd aquad Igabon platon sa diin nagdugay ini sang kapin 5 ka minutos.
Maswerte naman nga wala sang may napilasan sa ila nga hanay samtang ginapahayag nga may yara sang duha ka mga rebelde ang napilasan bangud sa nakit-an nga mga tulo sang dugo sa ginluntaran sang engkwentro.
Suno kay Gastura, pina-agi sa report sang pila ka mga sibilyan sa ila nga may yara sang nagapatigayon nga extortion activities nga mga katapo sang rebelde sa ila lugar natigayon nga mapadulungan ang nasambit nga lugar.
Matandaan narekober sa lugar, ang isa ka magnum 357 Revolver, 3 ka bilog nga Anti-Personnel Mine (1 ka pipe bomb kag 2 ka claymore mine), duha ka M16 short magazine, isa ka detonator switch, 50 metros nga wire, 23 kag M16 live ammo, 24 ka M16 nga empty shell, anum ka 375 live ammo, 4 ka 357 empty shell kag isa ka duyan.
Sa karun padayon ang ila pagpatigayon sang imbestigasyon sa lugar agud matumod ang pagkakilanlan sa mga ini.
Samtang, nagapanawagan naman si Gastura sa mga miyembro sang rebelde nga kun mahimo magsungka na kag magbalik sa sabak sang gobyerno agud mag-umpisa sang panibag-o nga pagpangabuhi kaupod ang ila mga pamilya.
