Nangin matalunsay ang katapusan nga adlaw sang filing sang Certificate of Candidacy (COC) para sa Midterm Election 2025.
Sa interview sang Bombo Radyo sa Provincial Election Supervisor nga si Atty. Salud Milagros “Tictac” Villanueva, ginpahayag sini nga sa ginpatigayon nga filing sang COC sang mga magapapili sa eleksyon nangin madinalag-on ini sa sulod sang walo ka adlaw.
Suno kay Villanueva, sa palaabuton nga pagpiniliay makabig ini nga “super election” sa 2025 bangud tatlo ka serye ang matabo kung sa diin ini ang ginakalakipan sang Midterm Election, Bangsamoro Autonomous Region in Muslim Mindanao (BARMM), kag ang Sangguniang Kabataan eleksyon.
Mahibaluan nga nagapreparar na sa karun ang mga election officers, technical staff kag member sang electoral board para sa pagamit sang Automated Counting Machine (ACM).
Kaangut sini, nagpalab-ot naman sang pagpasalamat ang provincial election supervisor sa nagkalain-lain nga mga ahensya sang gobyerno nga nagbuylog kag nagpakigbahin agud mapabilin ang seguridad kag katawhay sa filing sang COC.
