ROXAS CITY – Bangud sa serye sang mga suicide incidents nga nagakahinabo sa probinsiya sang Capiz, naalarma karon ang Archdiocese of Capiz kag nagpaguwa sang pastoral letter nga ginbasa sa tanan nga misa sa mga simbahan sa probinsiya.
Ginpahayag ni Monsignor Cyril Villareal, Vicar General sang Archdiocese of Capiz kag rector sang Colegio de la Purisima Concepcion, bisan ang Señor Arsobispo nga si Most Reverend Jose Advincula Jr., ang naalarma sa nagataas nga numero sang mga indibidwal nga nagakomiter sang suicide rason nga naghimo sang tikang ang Simbahan agud liwat mapalab-ot sa mga tumuluo ang panindugan sang Simbahan Katolika.
Nagpahanumdum si Villareal nga wala nagabag-o ang pagtulu-unhan sang Simbahan pag-abot sa isyu sang paghikog, sa diin isa ini ka daku nga sala.
Wala sang kinamatarung ang tawo nga kuhaon ang iya kaugalingon nga kabuhi bangud ginpahulam lamang ini sang Diyos.
Ginklaro man sini nga ang paghikog ang nagakapas sa ikalima nga sugo nga indi magpatay.
Apang sa pihak sini nagapati ang Simbahan nga posible nadulman lamang kag indi klaro ang panghuna huna sang amo nga indibidwal rason nga nakakomiter ini sang suicide.
Ginapanindugan man ni Villareal nga wala sang kinamatarung ang iban nga tawo nga husgahan ang naghimo sini sa diin sa baylo nga ini ang ila himoon, pangamuyuan na lamang sila nga kabay nga ang grasya sang Diyos ang magapatawad sa ila.
Pila man sa mga rason sa pagpanginmatay sang tawo amo ang kakulang sang suporta gikan sa pamilya, pag-isahanon ukon pagdaug daug ukon bullying, problema sa personal nga kabuhi.
Nagpahanumdum man ini sa mga ginikanan nga hatagan atensyon kag –iprayoridad ang mga kabataan para mangin malapit sila sa isa kag isa.
Nagalaum man si Villareal nga kuntani magserbe nga extension sang mga puluy-an ang eskwelahan agud mabatyagan sang mga kabataan nga ginabaton kag ginapalangga sila.
Sa kabug-usan ang kaundan sang pastoral letter amo nga dapat may yara sang culture of presence ang tawo agud napabatyag sa isa kag isa nga may kaupod ini sa tanan nga tion.
